കൊച്ചി: കുവൈറ്റിലെ ബാങ്കിൽനിന്നുമെടുത്ത കോടികളുടെ വായ്പ തിരിച്ചടയ്ക്കാതെ മലയാളികള്‍ രാജ്യം വിട്ട സംഭവത്തില്‍ കേസുകള്‍ ജില്ല ക്രൈംബ്രാഞ്ചിന് കൈമാറും. ഇവരില്‍നിന്നും കിട്ടാക്കടം തിരിച്ചുപിടിക്കാന്‍ കുവൈറ്റ് ഗള്‍ഫ് ബാങ്ക് അധികൃതര്‍ കേരളത്തിലെത്തിയതിനു പിന്നാലെയാണ് നടപടി. വിവിധ വായ്പകളിലായി 700 കോടിയോളം രൂപ തിരിച്ചടയ്ക്കാനുണ്ടെന്നാണ് ബാങ്ക് അധികൃതർ പറയുന്നത്.
തിരുവനന്തപുരത്ത് പോലീസ് ആസ്ഥാനത്ത് നേരിട്ടെത്തി ഇവര്‍ നല്‍കിയ പരാതിയുടെ അടിസ്ഥാനത്തില്‍ സംസ്ഥാനത്തുടനീളം പോലീസ് എഫ്‌ഐആര്‍ രജിസ്റ്റര്‍ ചെയ്ത് അന്വേഷണം ആരംഭിച്ചു. നിലവില്‍ 10 എഫ്‌ഐആര്‍ രജിസ്റ്റര്‍ ചെയ്തതില്‍ ഒമ്പത് എണ്ണവും എറണാകുളം സ്വദേശികള്‍ക്കെതിരേയാണ്. കോട്ടയം കുമരകം സ്വദേശിക്കെതിരെയും എഫ്‌ഐആര്‍ രജിസ്റ്റര്‍ ചെയ്തിട്ടുണ്ട്.
പോലീസ് ആസ്ഥാനത്തുനിന്നുള്ള പ്രത്യേക ഉത്തരവിന്‍റെ അടിസ്ഥാനത്തില്‍ ജില്ലാ കൈംബ്രാഞ്ചുകള്‍ക്ക് കേസ് കൈമാറാനാണ് തീരുമാനം. ദക്ഷിണമേഖല ഐജി അന്വേഷണം ഏകോപിപ്പിക്കും. തട്ടിപ്പ് നടത്തിയവര്‍ക്കെതിരേ കടുത്ത ക്രിമിനല്‍ നിയമനടപടികള്‍ സ്വീകരിക്കാനാണ് ബാങ്ക് അധികൃതര്‍ ഉദ്ദേശിക്കുന്നതെന്ന് ബാങ്കിന് കേരളത്തില്‍ നിയമസഹായം നല്‍കുന്ന ഹൈക്കോടതി അഭിഭാഷകന്‍ തോമസ് ജെ.ആനക്കല്ലുങ്കല്‍ പറഞ്ഞു.
ക്രിമിനല്‍ ഗൂഢാലോചന, കൃത്രിമ രേഖകള്‍ ഉപയോഗപ്പെടുത്തിയുള്ള വിശ്വാസ വഞ്ചന, സ്വത്തപഹരണം നടത്തി അപ്രത്യക്ഷമാകല്‍ ഉള്‍പ്പെടെയുള്ള കുറ്റങ്ങള്‍ ആരോപിച്ച് 1860 ഇന്ത്യന്‍ ശിക്ഷാ നിയമത്തിലെ 406, 420 തുടങ്ങിയ വകുപ്പുകള്‍ പ്രകാരമായതിനാല്‍ ജാമ്യ സാധ്യതയില്ലാത്ത എഫ്‌ഐആര്‍ ആണിത്.
തട്ടിപ്പ് നടത്തിയ മലയാളികള്‍ 1,425 പേര്‍
കേരളത്തില്‍ മാത്രം 1425 ഓളം പേര്‍ കുവൈറ്റില്‍ തട്ടിപ്പ് നടത്തി ഇവിടേക്ക് വന്നിട്ടുണ്ടെന്നാണ് കണക്ക്. 2019- 20 കാലഘട്ടത്തിലാണ് തട്ടിപ്പുകള്‍ ഏറെയും നടത്തിയിട്ടുള്ളത്. ആദ്യം ബാങ്കില്‍നിന്ന് ചെറിയ തുക വായ്പയെടുത്ത് ഇത് കൃത്യമായി തിരിച്ചടച്ച് ക്രെഡിറ്റ് സ്‌കോര്‍ ഉയര്‍ത്തിയ ശേഷം വലിയ തുക വായ്പയെടുത്ത് ഇവിടെനിന്നും മുങ്ങുകയായിരുന്നു.
കുവൈറ്റിനു പുറമേ യുഎഇയും സൗദി അറേബ്യയും ഖത്തറും ഒമാനും ഉള്‍പ്പെടെ മിക്ക ഗള്‍ഫ് രാജ്യങ്ങളിലുമുള്ള ബാങ്കുകള്‍ മുമ്പുണ്ടാകാത്തവിധം കഴിഞ്ഞ അഞ്ചാറു വര്‍ഷത്തിനുള്ളില്‍ വായ്പാ തട്ടിപ്പിനിരയായിട്ടുണ്ട്. സ്വത്ത് ജപ്തി ചെയ്ത് കുടിശികത്തുക ഈടാക്കുന്നതിനു പുറമേ പ്രതികള്‍ക്ക് ഏഴു വര്‍ഷം വരെ തടവു ശിക്ഷ നല്‍കാനും വ്യവസ്ഥ ചെയ്യുന്ന വകുപ്പുകള്‍ കേസുകളില്‍ ഉള്‍പ്പെടുന്നു.
ഇതിനകം രജിസ്റ്റര്‍ ചെയ്തിട്ടുള്ള ഭൂരിഭാഗം എഫ്ഐആറിലെയും പ്രതികള്‍ കുവൈറ്റ് മിനിസ്ട്രി ഓഫ് ഹെല്‍ത്ത് ജീവനക്കാരായിരുന്നവരാണ്. ഇവരില്‍ ചിലര്‍ മാത്രമാണ് നിലവില്‍ കേരളത്തിലുള്ളതെന്നും മിക്കവരും യൂറോപ്യന്‍ രാജ്യങ്ങളിലോ യുഎസ്, കാനഡ, ഓസ്‌ട്രേലിയ, ന്യൂസിലാൻഡ് തുടങ്ങിയ രാജ്യങ്ങളിലോ ആണെന്നുമാണ് പ്രാഥമിക അന്വേഷണത്തിനു ശേഷമുള്ള പോലീസ് നിഗമനം.
ഇന്ത്യന്‍ പൗരന്‍ വിദേശത്തു കുറ്റകൃത്യത്തിലേര്‍പ്പെടുന്ന പക്ഷം ഇന്ത്യയിലെന്നതുപോലെ തന്നെ നിയമനടപടികള്‍ നേരിടണമെന്നു വ്യവസ്ഥ ചെയ്യുന്ന സിആര്‍പിസി സെക്ഷന്‍ 188 ചൂണ്ടിക്കാട്ടിയാണ് ബാങ്കുകള്‍ കേസുമായി മുന്നോട്ടു പോകുന്നത്. ഗള്‍ഫ് രാജ്യങ്ങളിലെ മിക്ക ബാങ്കുകളും ഇന്ത്യന്‍ പൗരന്മാരില്‍ നിന്ന് ഇപ്രകാരം കുടിശിക ഈടാക്കാനുള്ള തയ്യാറെടുപ്പിലാണ്.
